Kalaallit Nunaanni adventistit 1953-imi inatsisitaarnerup kingornagut Andreas Nielsen adventistit palasiini siullerpaalluni Kalaallit Nunaannukarpoq, peqqaataani Sisimiut attaveqarfigeqqaarsimallugit. Atuagassiannguaq matuma qulaaniittoq (ârdlorit) nutsertissimavaa, Kitaalu sinerlugu tamaani najugaqartut tikeraartalersimallugit. Atuagassiannguup taassuma saniatigut atuakkat arlariit qallunaatoortut, kingorna kalaallisuumut nutserneqarsimasut, nassatarisarsimavai. Atuakkat ”Kristusimut avĸutigssaĸ” (1956) aamma ”akiũnerssuaĸ” (1960) angerlarsimaffippassuarnut tunniussuunneqarsimapput.

Andreas Nielsenip ârdlorit ilisimaneqaatigilersimavaa, maannalu
ukiorpassuit qaangiussimalereeraluartut amerlasuunit suli eqqaamaneqarpoq. Piffissani
assigiinngitsuni marlunni Kalaallit Nunaanniissimavoq. Ukiullu ingerlaneranni atuakkat allat
saqqummersinneqarsimapputtaaq: ”bibele neriûteĸalersitsivoĸ” (1963), ”ilumôrtoĸ torĸortaĸ”
(1976), ”perĸíssuseĸ inûneruvdlo pivdluarnartue” (1979) aammalu quppersagaaqqat meeqqanut
biibilimillu ilinniarnermut atorneqartussat arlariinnguit.

1957-imi Ella Præstiin Danmarkimit Nuummut tikippoq, angerlarsimaffinnilu peqqissaasutut
sulilerluni. Skodsborgklinikkip pilersinneqarnissaanut aqqutissiueqataasimavoq. 1954-imilu palasit
illussaat Kissarneqqortuunnguami sananeqarmat unnukkut naapeqatigiittarnernut
naalagiartitsisarnernullu atorneqartarpoq. 1959-imi Skodsborgklinikki oqaluffillu allilerneqarlutik
aallartinneqarput. Ella Præstiinip timimik sungiusaasoq Anna Hogganvik Norgemeersoq 1959-imi
suleqatigilerpaa, 1961-imilu Noomi Hansen suleqatigilerlugu. Kingorna timimik sungiusaasunit
allanit taakku kingoraarneqarput.

Klinikkimit timimik sungiusaaviusumit suliffeqarfiit, utoqqaat illui, atuarfiit allallu
pulaarneqartarput, aammalu pitsaanerusumik inooriaaseqalernissaq taamalu pitsaanerusumik
inuuneqalernissaq eqqarsaatigalugit pujortassaartitsiniarluni kursuseqartitsisoqartarsimalluni.
Palasit arlariit taakkualu ilaqutaat piffissap ingerlanerani kingoraartaallutik najugaqartarsimapput.
Ilagiinnguillu kalaalersaqarlutillu qallunaartaqartut arfininngornerit tamaasa oqaluffimmi
naalagiaqatigiittarput, ulloq taanna sapaatip-akunnerata ulluisa arfineq-aapparimmassuk (sabbati).
Sapaammi meeqqat søndagsskoleqartitaasarput, atugarissaarnerulernissarlu eqqarsaatigalugu
sulinersuaqartarsimavoq pisariaqartitsisunut atisanik tunniussuisoqartarsimalluni. Palasit
assigiinngitsut biibili peqqissuserlu pillugit tamakkuninnga tusagaqarusuttunut
saqqummiussisarsimapput. Taamaalilluni ilagiit adventistiusut inunnut (timikkut, tarnikkut,
inooqatigiinnikkut anersaakkullu) ikiuinissamik isumaat inuppassuarnut nuannaarutaasimavoq.
Palasillu Nuummit aallartarlutik akuttunngitsumik angallatinnguamik sinerissamut
angalasarsimapput, tamaani atuakkat tuniniartarlugit ilagiinnullu adventistiusunut ilaasut
soqutiginnittullu pulaartarlugit. Taama tikeraartarnerminni tikilluaqqusaaneq misigisarsimavaat.
1980-ikkoqalermallu meeqqanut spejderinullu suliniarneq pingaartinneqarnerulersimapput.
Ilaatigut aningaasaqarneq peqqutigalugu klinikkimi sulineq 1990-kkut aallartittut
unitsinneqartariaqarsimavoq, aammalu palaseqartitsineq ingerlaannassanngitsoq
aalajangiunneqarsimalluni. Taamaasilluni ukiuni 45-ni Kalaallit Nunaanni sulisimaneq
pisortatigoortumik taamaatinneqarpoq, ilagiillu adventistit Danmarkimiittut 1998-imi illu
Nuummiittoq maanna Nuummi Eqqumiitsulianik Saqqummersitsiviusoq tunivaat. Tamatuma
kingornagut Kalaallit Nunaat palasimit (siullermik Jens Madsenimit 2007-ilu aallarnerfigalugu John
Pedersenimit) tikinneqartarpoq, ilaasortat ikittunnguusut adventistit ineriartortitsillutik
ikiuiniarlutillu sulisarnerannut ukiumoortumik katerittunut peqataasartut tikeraartarlugit.
Ukiuni kingullerni sisamani-tallimani ilagiit Kalaallit Nunaata inuinut sullissinertik
ingerlateqqilerpaat, Andreas Nielsenip pania Elsebeth Butenko uialu Tony Butenko aasaanerani
ukiaaneranilu Kitaani Kujataanilu angerlarsimaffinnut assigiinngitsunut pulaartittarlugit, atuakkanik
quppersagannguanillu meeqqanut inersimasunullu naleqquttunik nassataqartillugit. Inuillu
inussiarnersorpassuit naapittarpaat. 2024-mi aasap kingornagut aappariit Kalaallit Nunaanni
najugaqartut ilagiit adventistiusut missioniat nangillugu sulilernissaat pilersaarutigineqarpoq.